وعن عملها مع أحمد مجدي للمرة الثانية بعد مسلسل "الآنسة فرح"، أكدت: "فيه كيميا وصداقة لذيذة بيني وبين أحمد مجدي وإحنا اشتغلنا مشروع الآنسة فرح مع بعض ونجحنا سويا وكان الشغل حلو ما بيننا فبقينا عارفين بعض وده بان في فات الميعاد"، مشيرة إلي أن القضية التي يناقشها العمل وهي العنف الزوجي، "ظروف كل ست مختلفة من اللي بيتعرضوا للعنف الزوجي لكن بنصحها حطي لنفسك حدود تقبلي إيه ولحد فين لأنك في الآخر إنسانة، وأنا لو شوفت زوج بيضرب زوجته هبقي حاسة إني عاوزة أضربه".

وأضافت: "اللي بيحسسني بالأمان العيلة والاستقرار والتفهم وإنك تبقي شخص مش محتاج تشرح نفسك ولا تبرر نفسك والصحاب الحلوين السند".

كما تحدثت عن العمل المفضل لها في مسيرتها وهو مسلسل "هذا المساء" وقالت: "هو عمل مهم وأنا مبسوطة إني كنت جزء منه وإني اشتغلت مع  تامر محسن وأنا عملت كذا أوديشن للمسلسل. وهو قال لي  أنتي ممثلة شاطرة.

وعن الغناء قالت: "أنا أصلا بدأت بالتمثيل علي مسرح الجامعة الأول، وبعد كده شاركت مع فرقة "بهججة"، فالغنا جه بعد التمثيل، وأنا بحب الغنا من زمان لكن كنت محتاجة أجرب، وبتبسط لما ألاقي حاجة شبهي وعاوزة أعملها".

وعن مسلسل "مملكة الحرير" مع الفنان كريم محمود عبد العزيز والمنتظر عرضه يوم 29 يونيو، وقالت: "هو حدوتة فانتازية شيقة وشخصية مختلفة وأنا متحمسة لها ويا رب تعجب الناس وأنا بحب التجارب المختلفة لأنها ممتعة ومليانة حاجات أنتي بتتخيليها مالهاش مرجع محدد، وأنا بقدم فيه شخصية الأميرة جليلة".

أشارت أن "الحقب الزمنية المختلفة بتشغل خيالي وأنا مش هقدر أعيش التجربة دي غير دلوقت باللبس والديكور والتفاصيل كأنه عالم خيالي، وأكتر حقبة حبيتها كانت في مسلسل ليالي أوجيني".

وتطرقت للحديث عن حياتها الشخصية قائلة: "زوجي مدرب رياضي وهو نفسه إني أتدرب كل يوم، وهو له طريقة أكل معينة فباكل معاه أكل صحي طبعا لكن لما بيبقي نفسي في حاجة غير صحية أوي بعملها، وأكتر أكلة هو بيحب ياكلها من إيدي هي الكبدة، وهو ساعدني إني أرتب أولوياتي وإني أفهم نفسي صح وبيسمعني كويس جدا، وهو بيحب فيلم الممر كأكتر عمل  مفضل ليه من أعمالي".

واختتمت قائلة: أنا مش فعالة علي السوشيال ميديا لكن بشارك الحاجات اللي بحب أشاركها مع الجمهور"، واتمني  العمل مع المخرج مروان حامد، وكذلك العمل مع الفنان كريم عبد العزيز.

يمكنك مشاركة الخبر علي صفحات التواصل