كشف المخرج خالد يوسف عن العديد من المفاجآت التي تخص قضية المخرج عمر زهران مع زوجته شاليمار الشربتلي، وذلك من خلال مقطع فيديو عبر حسابه الشخصي على موقع التواصل الاجتماعي فيسبوك.

مفاجآت خالد يوسف في قضية عمر زهران

وقال خالد يوسف في مقطع فيديو رصده موقع تحيا مصر: مراتي عاشت فترة في جدة وأنا كنت بتردد عليها وشقتها في مصر كانت مقفولة واللي كان معاه المفتاح عمر زهران والمحاسب بتاعها وأنا اللي عرفت عمر زهران على شاليمار من 10 سنين وقولتلها اد ايه أنا بثق فيه وهو صاحبي وكان مسئول عن كل عقاراتها اللي في مصر ومعاه كل مفاتيحها.

وتابع خالد يوسف: لما اتسرقت الحاجات حققوا مع عمر والمحاسب عشان هما دول اللي معاهم المفتاح وسألوهم أسئلة عادية ومتوصلتش المباحث لتحديد من هو الفاعل.. لغاية ما فوجئنا من شهور بسيطة قالولها أن القضية اتحفظت عشان احنا معرفناش نجيب الفاعل.. وقررت تفتح القضية تاني.. وفي الفترة دي عمر زهران بدأ يتوتر وبدأ يحاول يلاقي مبررات كتير لعدم فتح القضية ولما فتحتها تاني بدأ يمنعها بأي شكل من أنها تمشي في القضية ولما فشلت جهوده قالها الحاجات دي موجودة فى الشقة تعالي ندور كويس يمكن نلاقيها.

خالد يوسف: لما قررنا نفتح قضية السرقة عمر زهران ارتبك واتوتر وكان بيمنع شاليمار بكل الأشكال من أنها تفتح القضية

واضاف خالد يوسف: وشاليمار قالتلي أنا مندهشة من إصراره.. عمر ارتبك وحاول يخليكي مكملش في القضية ودلوقتي قالي تعالي ندور في الشقة.. وبالفعل خدته وراحت وجابلها واحد اسمه عنتر قالها دا راجل مبروك وبيعرف يدور كويس وهيطلع الحاجة.. راحت معاه اربع خمس مرات.. وكل مرة راحت معاه كان بيطلع حاجة من المجوهرات.. ولما اتقبض على عنتر فيما بعد قال أنا كنت بدور بالساعة وبالساعتين في الأوضة وبعدين يدخل عمر زهران ويقولي دور في الحتة دي فلاقي الحاجة فيها.

خالد يوسف: مش هسكت للي شتمني

وفي مقطع الفيديو نفسه، أكد خالد يوسف على أنه سيتخذ كافة الإجراءات القانونية ضد من تعرض له بالسب والقذف، وقال: وأنا توجهت للجهات المسئولة وتقدمت ببلاغات ضد بعض اللي وجهوا ليا الاتهامات وأساءوا ليا قصفا وسبا وتشهيرا وطعنا في الأعراض.. ومن النهاردة مش ناوي أسكت.. أنا سكت كتير جدا على كل الحملات الممنهجة ضدي.